Kuri uyu wa Gatatu tariki 29 Werurwe 2017, ikipe ya Rayon Sports yakiriye Sunrise mu mukino wa shampiyona w’ikirarane maze iyi kipe ikomeje kugaragaza ko ishaka igikombe cya shampiyona byanze bikunze, ibasha gutsinda Sunrise yo mu Burasirazuba, ibintu bikomeje kubabaza cyane APR FC nk’ikipe y’abakeba bigaragara ko igenda irushaho guheba igikombe cya shampiyona cy’uyu mwaka.

Uyu mukino waranzwe n’ishyaka rikomeye ku makipe yombi, ku ruhande rwa Rayon Sports ikaba yiboneye intsinzi hakiri kare kuko ibitego byayo byose yabitsinze mu gice cya mbere cy’umukino, ubundi irwana no kubihagararaho kugeza umukino urangiye.

Ku munota wa 13 gusa w’umukino, nibwo Moussa Camara ukomoka muri Mali yatsindiye Rayon Sports igitego cyayo cya mbere ndetse ku munota wa 39 w’umukino Kwizera Pierrot nawe aza gushimangira ko bagomba gutaha intsinzi, ashyiramo igitego cya kabiri. Igice cya mbere kigiye kurangira, ku munota wa 45 w’umukino, Moussa Camara yongeye anyeganyeza inshundura za Sunrise maze igice cya mbere kirangira ari ibitego 3 bya Rayon Sports ku busa bwa Sunrise.

Mu gice cya kabiri cy’umukino, Sunrise yagarutse ishaka kwishyura ndetse no kwihagararaho ngo idatsindwa ibindi bitego. Ku munota wa 77 w’umukino, uwitwa Alex yayitsindiye igitego rukumbi yabashije kubona muri uyu mukino, maze umukino urangira ari ibitego 3-1.

Intsinzi ya Rayon Sports ntawabura kuvuga ko yashegeshe cyane abafana b’ikipe y’abakeba ya APR FC, kuko iyi ntsinzi yatumye Rayon Sports ikomeza kuyobora urutonde rwa shampiyona n’amanota 52, ikaba irusha mukeba wayo APR FC amanota 11 yose, bivuga ko kuyishyikira bigaragara nk’inzozi idashobora gukabya.