konka coffee
KONKA

AMAKURU

UKWEZI

Impuguke mu bya politike zikomeje kugaragaza ko Dr Frank Habineza atazabona n’ijwi 1%

Impuguke mu bya politike zikomeje kugaragaza ko Dr Frank Habineza atazabona n’ijwi 1%
13-06-2017 saa 14:53' | By Vincent Nsengiyumva | Yasomwe n'abantu 4062 | Ibitekerezo 4

Mu gihe mu Rwanda hari kuvugwa ibijyanye n’amatora y’umukuru w’igihugu arimo kwitegurwa ngo azabe muri Kanama uyu mwaka, bamwe mu mpuguke mu bya politike bakomeje kugaragaza ko Dr Frank Habineza uhagarariye ishyaka Green Party bizamugora kubona n’ijwi rimwe ku ijana (1%) hagendewe ku migabo n’imigambi agaragariza Abanyarwanda.

Ibi byagarutsweho n’impuguke mu bya politike ari bo; Dr Christophe Kayumba; Umwalimu muri Kaminuza akaba n’umushakashatsi ndetse na Dr Ngabitsinze Jean Chrysostome usanzwe ari Umunyamabanga Mukuru w’Ishyaka riharanira Demokarasi n’Imibereho myiza y’abaturage (PSD).

Mu kiganiro aheruka kugirana na Family TV, Dr Christophe Kayumba yavuze ko ishyaka rya Green Party nta bigwi rifite mu gihugu ndetse agaragaza ko ibyo kwiyamamaza ku mwanya w’umukuru w’igihugu ari nko kwikirigita ugaseka kuri Dr Frank Habineza ushaka uyu mwanya.

Yagize ati “[…] Ntabwo ndumva atanga ikiganiro haba kuri radio, televiziyo cyangwa ahandi hantu yahurira n’imbaga nyamwinshi y’Abanyarwanda ngo wenda atange porogaramu ye yazatuma bamutora. Nta n’ubwo nzi ikintu gifatika yaba yarakoze cyatumye ishyaka rye ryandikwa, ntabwo nzi icyo yari yakora azashingiraho yerekana kugirango bazamutore.”

Dr Kayumba akomeza avuga ko ishyaka rya Green Party rikiri rishya muri politike y’u Rwanda ndetse ngo nta n’abayoboke rifite bityo ko byatungurana rigejeje ku ijwi 1% mu matora y’umukuru w’igihugu.

Yagize ati “Kagame yavuga ati ‘nahagaritse Jenoside’, u Rwanda rumaze imyaka 23 rufite umutekano, amahoro, iterambere […] ndibaza, Frank Habineza azavuga iki? Green Party mu Rwanda ni ishyaka rikiri ritoya nta mateka rifite, nta byo barageraho, nibaza ko nta mahirwe muha kuburyo nanarenza ijwi 1 ku ijana bizantungura!”


Dr Kayumba Christophe avuga ko Frank Habineza adateze no kuzabona 1% mu matora y’umukuru w’igihugu

Uretse Dr Kayumba uherutse gutangaza ibi, Umunyamabanga Mukuru w’Ishyaka riharanira Demokarasi n’Imibereho myiza y’abaturage (PSD) Ngabitsinze Jean Chrysostome nawe mu kiganirompaka aherutse guhuriramo na Frank Habineza kuri Televiziyo y’igihugu, nawe yamukuriye inzira ku murima aho yamubwiye ko atagomba kwizera ko hari n’ijwi na rimwe azakura mu matora arimo yitegura.

Yagize ati “[….] Ntabwo mpamya ko wabona 1%. Ni byiza kwitabira, kuri wowe ni ikintu cyiza nk’umunyapolitiki ukiri muto, ufite ishyaka rishya, twe dufite imyaka 25 muri iyi politiki mu Rwanda, tuzi byinshi kubarusha. Ndahamya ko amahirwe yawe abarirwa ku ntoki…”

N’ubwo izi mpuguke muri politike zagaragaje ko ishyaka rya Green Party nta mahirwe na macye rifite yo kuzatsinda amatora y’umukuru w’igihugu muri Kanama, Dr Frank Habineza we ntahwema kugaragaza ko amatora nakorwa mu mucyo no mu bwisanzure ngo azayatsinda ku majwi asaga 51%.

Dr Frank Habineza uhagarariye ishyaka rya Green Party mu matora y’umukuru w’igihugu, ari mu bamaze kugeza kandidatire zabo ku ikubitiro kuri Komisiyo y’Igihugu y’Amatora (NEC) aho izasuzumwa maze hakarebwa niba yujuje ibimwemerera kuziyamamariza uyu mwanya koko.

Gutangaza lisiti ntakuka y’abakandida bemejwe ni ku wa 7 Nyakanga 2017 mu gihe kwakira kandidatire byatangiye kuri uyu wa 12 Kamena bikazarangira ku wa 23 Kamena 2017.

Amatora ya Perezida wa Repubulika azaba ku wa 3 Kanama ku Banyarwanda bari mu mahanga ndetse no kuwa 4 Kanama 2017 ku Banyarwanda bari imbere mu gihugu.


Tanga Igitekerezo
Ibitekerezo 4
some1 Kuya 15-06-2017

hhhhhhhhhh ubwo rero niba umuntu avuze ukuri abizire .....uyumupolitiki yavuze ukuri kuko nta majwi arenze 0.000015 green party izabona which is approximatel;y to 0 kandi trump yatsinnze kuko afite mullars and ni abahe banyarwanda bazi this guy uretse abo mu mijyi wenda na relatives and friends beeeeeeee. congz our political analysts you did ....that’s the truth

kwibeshya bibaho Kuya 14-06-2017

uyumugabo yakabaye yaragaraje ko ibyo yavuze ari uko abyumva kugiti ke, kuko ntazi abazitabira amatora icyo batekereza nuko bazatora, naho kuvugango nimpuguke ibyo sibyo byakwemeza ko ibyo atangaza ko ari ukuri.

uwayo Kuya 14-06-2017

muri iki gihe mbona bitungurana ubonye Macron na trump ntaho bari bazwi nyamara baratsinze turatungurwa sinzi uyu musesenguzi niba abizi

Patrick Kuya 13-06-2017

Uyu mugabo ngo ni KAYUMBA nawe mbona nta mw’Anakyste politique umurimo kabisa, ibaze nkibyo yatangaje

IGURIRE
Reba Ibindi Byinshi
konka Monaco
IBARUWA ZA JORIJI
nkusi
URUKUNDO
Magic Pictures
INKURU ZIKUNZWE
IBIRORI
Ibitekerezo
IZINDI NKURU WASOMA